एक लाख घूस लिएको भन्दै ताप्लेजुङका इञ्जिनियरलाई पाँच महिना कैद

२० मंसिर, काठमाडौं ।

घूस लिएको मुद्दामा एक इञ्जिनियर दोषी ठहर भएका छन् । बिहीबार विशेष अदालतले चार महिनाअघि दायर एक मुद्दामा कसूर कायमको फैसला गरेको हो ।

ताप्लेजुङको फुङलिङ नगरपालिकामा अधिकृत स्तर छैठौँ पदमा कार्यरत मोहम्मद अख्तर हुसैनले घूस लिएको भन्दै सजाय सुनाइएको छ । उनलाई पाँच महिना कैद र एक लाख रुपैयाँ जरिवाना हुने फैसला भएको हो ।

विशेषका सदस्यहरु खुसीप्रसाद थारु, रामबहादुर थापा र मुरारीबाबु श्रेष्ठको इजलासबाट यस्तो फैसला भएको हो । हुसैन एक लाख घूससहित पक्राउ परेपछि यसै वर्ष ८ साउनमा उनीविरुद्ध मुद्दा दायर भएको थियो ।

हुसैनले घूस मागिरहेको भनी अख्तियार दुरुपयोग अनुसन्धान आयोगमा उजुरी परेपछि उनलाई घूस लिइसकेको अवस्थामा नियन्त्रणमा लिइएको थियो । नगरपालिका र एक निर्माण कम्पनीबीच खेल मैदान निर्माणको सम्झौता भएको थियो ।

नगरपालिकाले निर्माण कम्पनीलाई भुक्तानी गर्नुपर्नेमा सो कार्यमा सहजीकरण गरिदिन उनले घूस लिएको पुष्टि भएको हो । उजुरी निवेदन, रकम लिएको तथ्य, अदालतमा बकपत्र तथा उजुरीकर्ता र हुसैनबीच भएको कुराकानीसमेत सुनेर विशेष उक्त निष्कर्षमा पुगेको हो ।