सर्वोच्चले उल्ट्यायो विशेषको फैसला, गैरकानूनी सम्पत्ति मुद्दामा भुर्तेललाई सफाइ

२४ मंसिर,

काठमाडौं ।विशेष अदालतको फैसला उल्ट्याउँदै सर्वोच्च अदालतले डा. केशवलाल भुर्तेललाई सफाइ दिएको छ । गैरकानूनी सम्पत्ति आर्जन गरी भ्रष्टाचार गरेको मुद्दामा उनी र उनकी श्रीमती रुकमणी भुर्तेलले सफाइ पाएका हुन् ।

सोमबार सर्वोच्चको संयुक्त इजलासले भुर्तेल दम्पत्तिलाई सफाइ दिने फैसला गरेको हो । पाँच वर्ष अघि दायर पुनरावेदनका तीन वटा मुद्दामा यस्तो फैसला भएको हो । भुर्तेल दम्पत्तिले दायर गरेको दुई पुनरावेदन तथा सरकारका तर्फबाट दर्ता भएको पुनरावेदन लगाउमा राखिएका थिए ।

सर्वोच्च प्रशासनले अभियान फाँटमा राखेको यो मुद्दामा न्यायाधीशहरु सपना प्रधान मल्ल र सारंगा सुवेदीको इजलासले यस्तो फैसला गरेको हो । भुर्तेल दम्पत्तिले विशेष अदालतको फैसलाविरुद्ध पुनरावेदन गरेकोमा दम्पत्तिको मुद्दामा उल्टी र सरकारको पुनरावेदनमा जिकीर नपुग्ने फैसला भएको हो ।

विशेषका तत्कालीन अध्यक्ष बाबुराम रेग्मी तथा सदस्यहरु प्रमोदकुमार वैद्य र नारायणप्रसाद पोखरेलको इजलासले गरेको फैसलालाई सर्वोच्चले उल्ट्याएको हो । विशेषको फैसलाविरुद्ध ०७५ को भदौमा केशवलाल र रुकमणीले पुनरावेदन गरेका थिए भने ४ असोजमा नेपाल सरकारको पुनरावेदन परेको थियो ।

०७५ को १३ वैशाखमा विशेषले मेडिकल सुपरिटेन्डेन्ट भुर्तेलले ३३ लाख ५६ हजार रुपैयाँभन्दा बढीको स्रोत खुलाउन नसकेको भन्दै सोबराबर सम्पत्ति जफत हुने तथा तीन महिना कैद हुने फैसला गरेको थियो । चितवनस्थित भरतपुर अस्पतालमा सुपरिटेन्डेन्ट हुँदा उनले गैरकानूनी सम्पत्ति आर्जन गरेको अख्तियार दुरुपयोग अनुसन्धन आयोगको दाबी थियो ।

आयोगले ०७२ को फागुनमा यो मुद्दा विशेषमा दायर गरेको थियो । भुर्तेल ०३२ सालदेखि सल्यानबाट सरकारी सेवामा प्रवेश गरेका थिए । उनी भरतपुर अस्पतालमा चार कार्यकाल मेसु पदमा रहिसकेका थिए । उनले सरकारी सेवामा रहँदा पौने तीन करोड रुपैयाँ गैरकानूनी रुपमा आर्जन गरेको अभियोग लगाइएको थियो ।