विश्वप्रसिद्ध गढीमाई मेला [तस्बिरहरू]

२४ मंसिर, बारा।

विश्वप्रसिद्ध गढीमाई मेलाको विशेष पूजा आइबारबाट सुरु भएसँगै श्रद्धालुको संख्या पनि बढेको छ । पाँच वर्षमा एक पटक लाग्ने यो मेला मंसिर मसान्तसँगै सम्पन्न हुनेछ ।

बाराको बरियारपुर नगरपालिका–१ मा लाग्ने यो मेलाको विशेष पूजा भने १७ गतेबाट २३ गतेसम्म भएको थियो । जसपछि बली प्रदान सुरु भइसकेको छ ।

यहाँ बली सुरु भएपछि भीडका कारण दैनिक सयौँ श्रद्धालु हराउने गरेका छन् । विशेषगरी भारतीयहरुसँग नेपाली फोन नम्बर नहुँदा भारतीय नै हराउँछन् ।

मान्छे नहराउन् र सम्पर्क भइरहोस् भनी नेपाल टेलिकमले वरपर केही नेटवर्क टावर पनि राखेको छ । उनीहरुको परिवासँग पुनर्मिलन नभएसम्मका लागि नगरपालिकाले व्यवस्था गरेको अस्थायी बासमै बस्छन् । सात स्थानमा पार्किङ र हराएका मान्छेका लागि माइकिङको व्यवस्था गरिएको छ ।

मेला व्यवस्थापनका लागि नगरपालिकाले ५० लाख र मधेश प्रदेश सरकारले ५० लाख बजेट छुट्याएको महागढीमाई नगरपालिकाका मेयर उपेन्द्र प्रसाद यादवले बताए ।

श्रद्धालुहरु बस, ट्र्याक्टर आदि रिजर्भ गरी मेला हेर्न पुग्ने गरेका छन् । उनीहरु बसमै र मन्दिर वरपरका खेतमा टेन्ट गाडेर बस्ने गरेका छन् । श्रद्धालुका लागि विभिन्न स्थानमा अस्थायी शौचालय भए पनि ती पर्याप्त छैन ।

मकवानपुर गढीबाट ल्याइएकीले उनलाई गढीमाई भनिएको हो । मनोकामना पूरा भएपछि श्रद्धालुले भाकलअनुसार देवीलाई बली चढाउँछन् । यो विश्वमै सबैभन्दा बढी बली दिइने मेला पनि हो ।

आइतबार राँगा बली दिइएको थियो भने सोमबार बोका बली र हाँससमेतको बली दिइएको छ । सर्वोच्च अदालतले २०७१ सालमै बली न्यूनीकरण गर्नका लागि सम्बद्ध निकायहरुलाई परमादेश दिएको छ ।