सर्वोच्चको भवन निर्माण तीन चौथाइ सकियो, इन्टेरियरका लागि ठेक्का आह्वान गरिने

१९ पुष, काठमाडौं।

सर्वोच्च अदालतको निर्माणाधीन भवन ७६ प्रतिशत सम्पन्न भएको छ । निर्माण कम्पनीका अनुसार २४ प्रशितत काम हुन बाँकी छ ।

०७७ चैतमा बिनापुरी–कालिका–समानान्तरले निर्माणका लागि ठेक्का पाएको थियो । यसको लागत पाँच अर्ब ८९ करोड रुपैयाँभन्दा बढी छ ।

पहिले नेपाली सेनाको तबेला भएको स्थानमा सर्वोच्चको उक्त भवन बन्न लागेको हो । उक्त निर्माण कम्पनीलाई पछिल्लो पटक ६ महिनाको म्याद थप गरिएको थियो । सर्वोच्च अदालतका अनुसार आगामी १८ असोजभित्र बाँकी काम सम्पन्न भइसक्नुपर्नेछ ।

उक्त भवन कूल १८ रोपनीमा बनिरहेको छ । भवनको निर्माण सम्पन्न भएपछि इन्टेरियरका लागि अर्को ठेक्का आह्वान गर्ने योजना सर्वोच्च अदालतको छ । १ लाख स्क्वायर फिटमा निर्माधाणीन उक्त भवनमा दुई तले पार्किङ छ भने माथिको अडिटोरियमसमेत जोड्दा आठ तले भवन हुनेछ ।

नयाँ भवनमा २१ जना न्यायाधीश सम्मिलित वृहत्त पूर्ण इजलासका लागि ठूलो इजलासको पनि व्यवस्था छ । साथै अन्य १७ वटा इजलास पनि रहेका छन् ।

सर्वोच्चले नयाँ भवन निर्माण भए पनि हालको मुख्य भवन नभत्काइने जनाएको छ । ऐतिहासिक महत्वका भएकाले त्यसमा संग्राहलय बनाइनेछ । हाल भने लेखा शाखा रहेको भवन भत्काइँदै छ । एनेक्स भवनको माथिल्लो तलासमेत भत्काउने योजना रहेको सर्वोच्चका एक अधिकारीले जानकारी दिए ।

यो भवन निर्माणसँग जोडिएको अनियमिततामा तत्कालीन प्रधानन्यायाधीश चोलेन्द्र समशेर जबरासमेत मुछिएका थिए । महालेखापरीक्षकले प्रश्न उठाए पनि न्यायालयमा अख्तियार प्रवेश गर्न नपाउने भएका कारण यो विषयमा छानबिन नै भएको थिएन ।