पर्सा र तनहुँका शिक्षकले बुझाए नक्कली प्रमाणपत्र, विशेषले सुनायो सजाय

१४ असार, काठमाडौं

नक्कली शैक्षिक प्रमाणपत्रका आधारमा जागिर खाने दुई शिक्षकलाई सजाय सुनाइएको छ । पर्सा र तनहुँमा कार्यरत शिक्षकहरुलाई विशेषले शुक्रबार कसुरदार कायम गर्दै सजाय सुनाएको हो ।

पर्साको धोबिनी गाउँपालिकास्थित श्री नेपाल राष्ट्रिय प्राथमिक विद्यालयमा कार्यरत शिक्षक जनार्दन प्रसाद कानूको अध्यापन अनुमति पत्र नै नक्कली रहेको खुलेको थियो । जसपछि उनीमाथि गत १० वैशाखमा मुद्दा दायर भएकोमा ठहर हुने फैसला भएको हो ।

अख्तियार दुरुपयोग अनुसन्धान आयोगका अनुसार उनको प्राथमिक तह अध्यापन अनुमति पत्र नक्कली रहेको देखिएको थियो । झुठा अनुमतिपत्रका आधारमा उनले शिक्षण सुरु गरेपछि सजाय सुनाइएको हो ।

यस मुद्दामा विशेषका अध्यक्ष टेकनारायण कुँवर तथा सदस्यहरु मुरारीबाबु श्रेष्ठ र रितेन्द्र थापाको इजलासले फैसला गरेको हो । विशेषका प्रवक्ता धनबहादुर कार्कीका अनुसार उनलाई ६ महिना कैद र १० हजार रुपैयाँ जरिवानाको फैसला भएको छ ।

यसैगरी विशेषले तनहुँकी शिक्षिका सुनिता उपाध्याय पौडेललाई पनि सजाय सुनाएको छ । उनीमाथि अख्तियारले गत २९ फागुनमा मुद्दा चलाएको थियो ।

जसमाथि विशेषका सदस्यहरु खुसीप्रसाद थारु, तेजनारायण सिंह राई र रामबहादुर थापाको इजलसाले सुनुवाइ गरेको हो । पौडेललाई विशेषले ३ हजार रुपैयाँ जरिवाना हुने सजाय सुनाएको छ ।

तत्काल प्रचलित भ्रष्टाचार निवारण ऐन, २०१७ अनुसार उनलाई सजाय सुनाइएको हो । उनले माध्यमिक शिक्षा परिषद् क्षेत्रीय कार्यालय वाराणसीबाट हाइस्कुल उत्तीर्ण गरेको नक्कली शैक्षिक प्रमणपत्र पेस गरी नियुक्ति लिएकी थिइन् ।