भारतमा पनि देखियो एचएमपिभी, नेपाल पनि जोखिममा

२२ पुष, काठमाडौं।

भारतमा पनि ह्युमन मेटाप्युमो भाइरस (एचएमपिभी) भाइरसको संक्रमण देखिएको छ । यससँगै खुला सीमा भएको नेपाल पनि यसको जोखिममा छ ।

भारतको कर्नाटक राज्यमा यस भाइरसबाट संक्रमित दुई बालबालिका भेटिएका हुन् । नियमित परीक्षणको क्रममा ती व्यक्तिहरुमा भाइरस भेटिएको भारतको केन्द्रीय स्वास्थ्य मन्त्रालयले सार्वजनिक गरेको छ ।

भारतीय स्वास्थ्य मन्त्रालयका अनुसार तीन महिनाकी बालिकामा सङ्क्रमण देखिए पनि उपचारपछि उनलाई अस्पतालबाट डिस्चार्ज गरिएको थियो । सोमबार बिहानै आठ महिनाको एक बच्चामा पनि एचएमपीभी देखिएपछि उनको उपचार बैंगलोरस्थित एक अस्पतालमा उपचार भइरहेको जनाइएको छ । उनको अवस्था स्थिर भए पनि चिकित्सकीय निगरानीमा राखिएको छ ।

चीनमा यो भाइरसबाट संक्रमित बढेसँगै आवश्यक सतर्कता अपनाइएको छ । चिसो मौसम भएका कारण श्वासप्रश्वास सम्बन्धी बढ्दो रोगहरुमाथि निगरानी राख्न सुरु गरिएको चिनियाँ सञ्चारमाध्यमले जनाएका छन् ।

यद्यपि नेपालमा भने एचएमपिभीबाट संक्रमित यस अघि पनि भेटिएका छन् । एक दशक अघि नै यो भाइरस नेपालमा भेटिएको शुक्रराज ट्रपिकल तथा सरुवा रोग अस्पतालका क्लिनिकल रिसर्च युनिटका संयोजक डा. शेरबहादुर पुन बताउँछन् ।

पुनका अनुसार सन् २०१४ मा गरिएको एक अनुसन्धानमा नेपालमा एचएमपीभी भाइरस भेटिएको थियो । रुघाखोकीझैँ लक्षण हुने यो भाइरस म्युटेसन नभएमा बढी जोखिम नहुने उनको भनाइ छ । यद्यपि सर्वसाधारणमा चिसो लाग्नुलाई सामान्य मानेको हुँदा यो धेरैमा सर्ने जोखिम छ ।

चीनमा विशेषगरी १४ वर्षमुनिका बालबालिकामा यो भाइरस देखिएकोमा भारतमा पनि बालबालिकामा भेटिएको हो । चीनको आधिकारिक सञ्चारमाध्यम ग्लोबल टाइम्सका अनुसार उत्तरी चीनका क्षेत्रहरू बाहेक एचएमपीभीका घटनाहरू राजधानी बेइजिङ, दक्षिणपश्चिमी सहर चोङकिङ, दक्षिणी चीनको ग्वाङ्डोङ प्रान्तमा भेटिएका छन् । चीनका साथै भारतमा पनि भेटिएपछि नेपाल पनि उच्च जोखिममा देखिएको छ ।