एक लाख २० हजार घूस मागेका पाललाई ६ महिना कैद

२७ असार, काठमाडौं

कैलालीमा कार्यरत जलाधार व्यवस्थापन अधिकृत प्रभात पाललाई विशेष अदालतले भ्रष्टाचार मुद्दामा दोषी ठहर गर्दै सजाय सुनाएको छ । उनलाई ६ महिना कैद र १ लाख २० हजार रुपैयाँ जरिवाना हुने सजाय सुनाइएको हो ।

पाल राष्ट्रपति चुरे–तराई मधेश संरक्षण विकास समितिमा कार्यरत थिए । उनले तटबन्ध निर्माण कार्यको पहिलो रनिङ बिल भुक्तानीमा सहजीकरण गर्ने प्रयोजनका लागि घूस मागिरहेको उजुरी अख्तियार दुरुपयोग अनुसन्धान आयोगमा परेको थियो ।

अधिकृत पालले सेवाग्राहीबाट एक लाख २० हजार रुपैयाँ घूस लिइसकेको अवस्थामा पक्राउ परेका थिए । यसै वर्ष ५ वैशाखमा उनलाई अख्तियारको टोलीले नियन्त्रणमा लिएको थियो ।

यस विषयमा २८ वैशाखमा मुद्दा दायर भएकोमा तीन महिनामै फैसला भएको हो । विशेषका अध्यक्ष टेकनारायण कुँवर तथा सदस्यहरु रामबहादुर थापा र रितेन्द्र थापाको इजलासले यस्तो फैसला गरेको हो ।