गौरबाट भैरहवा गइरहेको बस दुर्घटना हुँदा एकको मृत्यु

१५ असार, रौतहट

जिल्ला सदरमुकाम गौरबाट भैरहवा जाँदै गरेको बस दुर्घटना हुँदा एक जनाको मृत्यु भएको छ । गौर–चन्द्रनिगाहपुर सडक खण्डको जयनगर चोक नजिक बस दुर्घटनाग्रस्त भएको हो ।

दुर्घटनामा ८ जना घाइते भएको प्रहरीले जनाएको छ । भैरहवा जाँदै गरेको ना ७ ख ८४१४ नम्बरको शनिबार बिहान बिहान ८ बजे अनियन्त्रित भई दुर्घटनाग्रस्त हुन पुगेको हो ।

जसमा माधवनारायण नगरपालिका ३ भेल्हीका शैलेन्द्रकुमार गिरीकी १८ बर्षिया छोरी नेहाकुमारी गिरीको मृत्यु भएको प्रहरीले जनाएको छ । दुर्घटना लगत्तै इलाका प्रहरी कार्यालय गरुडा र शिवनगरबाट गएको प्रहरी टोलीले घाइतेहरूको उद्धार गरेको थियो ।

घाइतेहरुलाई उपचारको लागि स्थानीय अस्पतालमा पठाइएको प्रहरीले जनाएको छ । उक्त दुर्घटनामा २६ वर्षिया रन्जुदेवी दासको दाहिने हात भाँचिएको र उनको उपचार ग्राण्डी अस्पताल गरुडामा भइरहेको जिल्ला प्रहरी कार्यालय रौतहटले जनाएको छ ।

दुर्घटनामा घाइते भएका सात जनाको शिवनगर र गरुडामा उपचार भइरहेको छ भने दुर्घटनापछि बसका चालक र सहचालक फरार छन् । दुर्घटनाबारे प्रहरीले थप अनुसन्धान गरिरहेको छ ।