बार अध्यक्षले अभिव्यक्ति दिँदाको भिडियो झिकाउने सर्वोच्चको आदेश

२३ पुष, काठमाडौं।

अदालतको अवहेलना मुद्दा खेपिरहेका कानून व्यवसायीहरुको छाता संगठन नेपाल बार एसोसिएसनका अध्यक्षले बोलेको भिडियो झिकाउन सर्वोच्च अदालतलेले आदेश दिएको छ । सर्वोच्चको संयुक्त इजलासले मंगलबार यस्तो आदेश गरेको हो ।

बार अध्यक्ष तथा वरिष्ठ अधिवक्ता गोपालकृृष्ण घिमिरेले गत असोजमा दिएको अभिव्यक्तिका कारण उनीमाथि मुद्दा चलिरहेको छ । मंगलबार यो मुद्दा न्यायाधीशद्वय नहकुल सुवेदी र अब्दुल अजिज मुसलमानको इजलासमा रहेकोमा यस्तो आदेश भएको हो ।

आदेशमा छ, ‘..प्रत्यर्थीको अभिव्यक्ति मिति ०८१÷०६÷११ मा काठमाडौं जिल्ला अदालत बार इकाइले आयोजना गरेको कार्यक्रममा व्यक्त गरेको भन्ने लिखित जवाफको प्रकरण नं. ४ मा उल्लेख भएको देखिँदा उक्त कार्यक्रमको श्रव्य दृष्यको छायांकन÷अभिलेख आयोजक बार इकाइबाट झिकाइ प्रत्यर्थीलाई देखाइ सुनाइ सोको सनाखत गराइ मिसिल सामेल गरी नियमानुसार पेस गर्नू ।’

अध्यक्ष घिमिरेमाथि यसै वर्ष १४ असोजमा अवहेलना निवेदन दर्ता भएको थियो । बारले विरोध र आन्दोलन गरिरहँदा ६ मध्ये दुई जना न्यायाधीशलाई सर्वोच्चमा सिफारिस गरिएको थियो । तत्कालीन प्रधानन्यायाधीश विश्वम्भरप्रसाद श्रेष्ठको नेतृत्वमा बसेको परिषद् बैठकले १२ असोजमा उनीहरुको नाम सिफारिस गरेपछि बार आक्रोशित बनेको थियो ।

जसपछि तत्कालीन प्रधानन्यायाधीश श्रेष्ठले लेनदेन मिलाउन नियुक्ति सिफारिस गरेको अभिव्यक्ति बार अध्यक्ष घिमिरेले दिएका थिए । यसै विषयमा सर्वोच्चका उपरजिष्ट्रार गोविन्दप्रसाद घिमिरेले अवहेलनामा कारवाही गर्नुपर्ने भन्दै टिप्पणी उठाएका थिए ।

यस मुद्दामा सर्वोच्चले घिमिरेसँग यस अघि लिखित जवाफ माग गरेको थियो । यसअनुसार उनले सर्वोच्चमा लिखित जवाफ बुझाइसकेका छन् ।

गत वर्ष असोज सुरुबाट लागू हुनेगरी न्याय परिषद् नियमावली संशोधन गरिएको थियो । तर यो संविधान र कानूनविपरीत रहेको भन्दै बारले विरोध गर्दै आएको छ ।

हेर्नुहाेस् सर्वाेच्च अदालतकाे आदेश –