सार्केगाडका अध्यक्षसमेत पाँच भ्रष्टाचारी ठहर : आफ्नै जग्गमा फर्म दर्ता गरी अनुदान, परिवारकै सदस्य उपभोक्ता समितिमा

विशेष अदालतले हुम्लाको सार्केगाड गाउँपालिकाका अध्यक्ष, प्रमुख प्रशासकीय अधिकृत समेत पाँच जनालाई भ्रष्टाचार मुद्दामा दोषी ठहर गरेको छ । गत २३ असारमा दायर मुद्दामा विशेषले मंगलबार आंशिक ठहरको फैसला गरेको हो ।

गाउँपालिका अध्यक्ष कृष्ण रोकाया तथा प्रमुख प्रशासकीय अधिकृत रुद्र बहादुर शाही दोषी पाइएका हुन् । साथै विशेषका अनुसार हंश रोकाया, सेतु रोकाया र तुलाराज रोकाया पनि दोषी पाइएका छन् । हंश अध्यक्ष कृष्णका सहोदर दाजु हुन् भने सेतु श्रीमती हुन् ।

विशेषका अध्यक्ष टेकनारायण कुँवर तथा सदस्यहरु तेजनारायण सिंह राई र रामबहादुर थापाको इजलासले यस्तो फैसला गरेको हो । विशेषका अनुसार यस मुद्दामा पाँच जना भ्रष्टाचारी ठहर भए पनि अन्य चार आरोपीलाई भने सफाइ दिइएको छ । यस मुद्दामा गाउँपालिका उपाध्यक्ष जोसी धामी, लेखापाल पूर्णप्रसाद आचार्य, इञ्जिनियर रामराज शाही र सब ओभरसियर पदमबहादुर धामीलाई सफाइ दिइएको हो ।

गाउँपालिका अध्यक्ष रोकायाले आफ्नै जग्गामा कोइलिङ कृषि तथा पशुपालन फर्म दर्ता गराएका थिए । उनलाई र प्रमुख प्रशासकीय अधिकृत रुद्रबहादुर शाहीलाई दुई वर्ष कैद र ९ लाख ७५ हजार रुपैयाँ जरिवाना हुने सजाय सुनाइएको छ । साथै दुवैबाट बिगो असुलउपरसमेत हुने फैसलामा उल्लेख छ ।

निजी जग्गामा कृषि फर्म दर्ता गरी सो फर्म मात्र प्रतिस्पर्धामा छनौट हुनेगरी कृषि अनुदान लिएको, सुनियोजित रुपमा आफ्नै फर्मलाई अनुदान प्राप्त गर्न भूमिका खेलेको भन्दै अध्यक्ष रोकायालाई सजाय सुनाएको हो । प्रमुख प्रशासकीय अधिकृत शाही सम्झौतापत्रमा हस्ताक्षर गरेको तथा भुक्तानी दिने कार्य गरेको भन्दै उनले समेत अध्यक्षसरहकै कसुर गरेको ठहर इजलासको छ ।

यसैगरी हंश रोकाया, सेतु रोकाया र तुलाराज रोकायाले भने मतियारको कसूर गरेको निष्कर्ष इजलासको छ । जस कारण उनीहरुलाई मुख्य प्रतिवादीभन्दा आधा सजाय सुनाइएको हो । उनीहरुलाई जनही एक वर्ष कैद र ४ लाख ८७ हजार पाँच सय रुपैयाँ जरिवाना हुने भएको छ । बिगो भने असुलउपर भइसकेको भन्दै उनीहरुबाट उक्त रकम भराइरहन नपर्ने फैसलामा छ ।

गाउँपालिका अध्यक्ष रोकायाले आफैले निर्णय गरी आफ्नो फर्मका लागि बजेट छुट्याएका थिए । सार्वजनिक पदमा रहँदा नै आफ्नै निजी जग्गामा रहेको आफैले सञ्चालन गरेको कृषि फर्मको घेरबार गर्ने कार्यका लागि उनले बजेट छुट्याएका थिए । आर्थिक वर्ष ०७६÷७७ र ०७७÷७८ मा क्रमशः ९ लाख ५० हजार र १० लाख रुपैयाँ छुट्याइएको अख्तियारको अनुसन्धानले देखाएको थियो ।

साथै उनले गलत कार्यको ढाकछोपका लागि आफ्नै परिवारका सदस्यहरुलाई उपभोक्ता समितिमा राखेका थिए । गाउँपालिका अध्यक्षले आफ्ना सहोदर दाजु हंश रोकायालाई अध्यक्ष, श्रीमती सेतुलाई कोषाध्यक्ष र तुलराजलाई सचिव बनाएका थिए । पर्खाल लगाउने योजनाको अनुगमन समितिबाट अनुगमन भएको प्रतिवेदनसमेत बनाएर भए गरेको कार्यभन्दा बढीको भुक्तानी नगरपालिकाबाट लिएका थिए ।