नक्कली भुटानी शरणार्थी प्रकरण : पूर्व गृहमन्त्रीका छोरा प्रतीक र बेचन झा पक्राउ

१५ असार, काठमाडौं

नक्कली भुटानी शरणार्थी प्रकरणका दुई जना प्रतिवादी पक्राउ परेका छन् । यो मुद्दा एक वर्षअघि जिल्ला अदालत काठमाडौंमा दर्ता भएको थियो ।

पूर्व गृहमन्त्री रामबहादुर थापा बादलका छोरा प्रतीक थापालाई प्रहरीले शुक्रबार नियन्त्रणमा लिएको हो । एक वर्ष अघि नै उनीविरुद्ध पक्राउ पूर्जी जारी भए पनि उनी फरार थिए ।

थापा केही समय भारत बसेको प्रहरी स्रोत बताउँछ । उनी नेपाल आएका बेला बौद्धबाट पक्राउ परेका हुन् ।

नेपाली नागरिकलाई भुटानी शरणार्थी बनाइ अमेरिका पठाउने कार्यमा उनकोसमेत संलग्नता देखिएको थियो । उनले उक्त गिरोहबाट पैसा बुझेको देखिएपछि उनलाई समेत उक्त मुद्दामा प्रतिवादी बनाइएको छ ।

यसैगरी यस मुद्दाका अर्का प्रतिवादी बेचन झा पनि प्रहरी नियन्त्रणमा पुगेका छन् । उनले नक्कली भुटानी शरणार्थीका विषयमा मन्त्रिपरिषद्बाट निर्णय गराउने भनी रामशरण केसीबाट दुई करोडको चेक बुझेका थिए ।

उनलाई कञ्चनपुरबाट शनिबार पक्राउ गरिएको प्रहरी स्रोतले जानकारी दिएको छ । पक्राउ परेका दुवै जनालाई आइतबार जिल्ला अदालत काठमाडौंमा उपस्थित गराइनेछ ।

गत वर्ष १० जेठमा ३० जनालाई प्रतिवादी बनाउँदै ठगीको मुद्दा दर्ता भएको थियो । यस मुद्दामा पूर्व गृहमन्त्री बालकृष्ण खाँणसमेत १३ जना थुनाबाहिर छन् । उनीहरु बाहिरै रहेर तारेख धाउँदैछन् ।

अर्कोतिर पुर्पक्षका लागि हाल सात जना थुनामा छन् । जसमा पूर्व गृहसचिव टेकनारायण पाण्डे, ईन्द्रजीत राई, उनका छोरा सागर राई, पूर्वमन्त्री टोपबहादुर रायमाझी छन् । मुख्य योजनाकारहरु सानु भण्डारी, केशवप्रसाद दुलाल र सन्देश शर्मा पनि थुनामै छन् ।

पक्राउ परेका थापा र झाका हकमा जिल्ला अदालत काठमाडौंले आइतबार मात्र आदेश गर्नेछ । उनीहरुलाई थुनामा पठाउने, धरौटी माग गर्ने वा साधारण तारेखमा रिहा गर्ने भन्ने निर्णय अदालतले गर्नेछ । यससँगै १० जना फरार प्रतिवादी रहेकोमा अब केवल ७ जना अदालतमा उपस्थित हुन बाँकी छन् ।