भारतको केरलमा दलित छात्रामाथि सामूहीक बलात्कार, ६४ जनामाथि छानबिन हुँदै

२९ पुष, काठमाडौं।

भारतको केरल राज्यमा एक दलित किशोरीमाथि सामूहीक बलात्कारको घटना सार्वजनिक भएको छ । बिबिसीले जनाएअनुसार यस मामिलामा ६४ जनामाथि अनुसन्धान भइरहेको छ ।

केरल पुलिसले पतनमथिट्टामा एक १८ वर्षीय दलित छात्रामाथि भएको गैंगरेपको जाँचका लागि एक विशेष दल गठन गरेको जनाएको छ । यस घटनामा ६४ अभियुक्त रहेकोमा २८ जना पक्राउ परिसकेका छन् ।

बलात्कृत किशोरीका छिमेकी, छिमेकीका साथी, उनका पिताका साथी, स्पोर्टस् कोचसमेतका व्यक्ति पक्राउ परेका हुन् । साथै प्रहरी नियन्त्रणमा रहेकामध्ये दुई जना १७ वर्षका नाबालक हुन् भने अन्य १९ देखि ४७ वर्षसम्मका पुरुष छन् ।

यस घटनामा दुई प्रहरी कार्यालयमा गरी हालसम्म १८ वटा उजुरी दर्ता भएका छन् । बालिकमाथि विगत पाँच वर्षमा तीन पटक सामूहीक बलात्कार भएको प्रहरी अनुसन्धानमा खुलेको छ । पहिलो पटक उनको घर नजिकै उनीमाथि यो घटना भएको प्रहरीको भनाइ छ ।

पीडिताका एक साथीले बलात्कार गरी उनको फोटो र भिडियो बनाइ बारम्बार त्यसैका आधारमा फेरि पनि त्यस्तो घृणित कार्य गर्ने गरेको प्रमाण प्रहरीले फेला पारेको छ । पीडिता मानसिक रुपमा निकै जटिल अवस्थामा रहेकि छिन् । एक एनजिओ पीडिता किशोरीको घर जाँदा उनले काउन्सेलरसामु यो कुरा राखेकी थिइन् ।