जाडोयाममा हृदयघातको जोखिम, यसरी जोगिनुस्

१८ पुष, काठमाडौं।

चिसो मौसममा सुतेकै अवस्थामा मृत्यु हुने घटनाहरु बढ्दै गएका छन् । चिकित्सकहरूका अनुसार सुतेकै बेलामा हुने त्यस्तो मृत्यु हुनुमा उच्च रक्तचाप, मधुमेह वा मुटुरोग जिम्मेवार हुन सक्छ ।

यी रोग भएका बिरामीमा ’स्लीप एप्निआ’ अर्थात् निद्रामा श्वासनली बन्द भएर सास रोकिने समस्या हुने गर्छ । यस्तो समस्याको सम्भावना जाडोयाममा बढ्ने गरेको छ । चिसोमा बढी समय बिताउँदा रक्तचाप बढ्ने र हृदयघात हुने सम्भावना केही बढी हुन्छ । विशेषगरी बिहानको समयमा यस्ता घटना बढ्ने गरेका छन् ।

यस्तोमा सुतिरहेकै बेलामा अचानक मृत्यु हुनसक्छ । हृदयाघात, मस्तिष्काघात वा फोक्सोमा हुने म्यासिभ पल्मोनरी इम्बोलिज्म यसको प्रमुख कारण हो । यसै कारण मुटुरोग भएका वा जोखिममा रहेकाहरुले एक्सरसाइज गर्दा सुरुमा हल्का व्यायाम गरेर मात्र सुरु गर्नुपर्ने चिकित्सकहरु सुझाव दिन्छन् ।

राति सुतेकै अवस्थामा मृत्यु हुने कारणहरू थुप्रा हुनसक्छन् । मृत्युको वास्तविक कारण थाहा पाउन पोस्टमार्टम एक मात्र विकल्प हो ।

चिकित्सकका अनुसार स्लीप एप्निआ भएको मानिसलाई मधुमेह र उच्च रक्तचापका कारण मुटुको समस्या हुन सक्ने र मुटुको समस्या हुने मानिसमा स्लीप एप्निआ हुने सम्भावना धेरै हुन्छ । यी दुवै समस्या एक आपसमा जोडिएका छन् ।

स्लीप एप्निआमा सुत्ने अवधि ६–७ घण्टा हुने भए पनि पटकपटक सास रोकिने कारण मानिसलाई गहिरो निद्रा लाग्नै पाउँदैन । जसकारण निद्राको गुणस्तर राम्रो हुँदैन ।

अझ जाडो महिनामा कतिपय मान्छेले न्यानो महसूस गर्न मदिरा सेवन गर्छन् । तर त्यो अझै घातक हुने चिकित्सक बताउँछन् ।

साथै जाडो महिनामा न्यानोका लागि हिटर वा चुल्हो बालेर झ्यालढोका लगाउँदा पनि निदाएकै बेला ज्यान जाने जोखिम हुन्छ ।