अन्डाको मूल्यमा ‘अस्वाभाविक’ वृद्धि

१८ पुष, काठमाडाैं।

नेपालमा पछिल्लो पटक कुखुराको अन्डाको मूल्य बढेको छ । यो पहिलो पटक भने होइन । केही समय यता अन्डाको मूल्य कमबेसी हुँदै आएको छ ।

तर कृषकका अनुसार भने कुखुरापालकलाई नोक्सानी भएको अवस्थामा केही राहत मिलेको छ । यसलाई मूल्यवृद्धि नभइ कृषकले लगानी उठाउन लागेको रुपमा बुझ्नुपर्ने उनीहरुको भनाइ छ ।

कुखुरापालक किसानले लागत उठाऊन् भनेर समर्थन मूल्य तोकिने गरेको छ । राजधानीमा अण्डाको मूल्य प्रतिगोटा २५ रुपैयाँसम्म पुगेको उपभोक्ताहरुको गुनासो छ । अर्कोतिर नेपाल लेयर्स कुखुरापालक सङ्घले भने अण्डाको खुद्रा मूल्य प्रतिगोटा २२ रुपैयाँ ५० पैसा तोकेको जनाएको छ ।

ठूलो अण्डाको लागत मूल्य नै प्रतिगोटा १६ रुपैयाँ ५७ पैसा पुगेको छ भने खरिदकर्ताले १७ रुपैयाँ प्रतिगोटामा फार्मबाट किन्ने गरेका छन् । यसको ढुवानीसमेतका लागत जोड्दा खुद्रा विक्रेताले प्रतिगोटा १९ देखि २० रुपैयाँमा अण्डा पाउने गरेका छन् । तर पसलबाट उपभोक्ताकहाँ पुग्दा भने यसको मूल्य २२ रुपैयाँ ५० पैसासम्मम पुग्ने गरेको कृषकहरुको भनाइ छ ।

कुखुरापालक किसानका अनुसार जाडो महिनामा अण्डाको खपत बढ्ने तर उत्पादन घट्ने भएकाले मूल्य बढेको बताएका छन् । ४४ लाख वटासम्म प्रतिदिन हुने उत्पादन अहिले घटेर २३ लाखमा झरेको छ ।