झापाको बालुवाटारको जग्गा प्रकरणमा उपस्थित भएका पुरी दम्पत्तिसँग धरौटी माग

१३ साउन, काठमाडौं

झापाको बालुवाटार भनिने स्थानको जग्गा व्यक्तिको नाममा दर्ता गरेको विषयमा अदालतमा उपस्थित भएका मुख्य प्रतिवादीहरुलाई धरौटी माग गर्ने आदेश भएको छ । आइतबार उपस्थित हुने निवेदनसहित आएका उनीहरुको बयानपछि धरौटी माग गर्ने आदेश आएको हो ।

यस मुद्दामा विशेषका अध्यक्ष टेकनारायण कुँवर तथा सदस्यहरु रामबहादुर थापा र रितेन्द्र थापाको इजलासले थुनछेक आदेश गरेको हो । यस प्रकरणका योजनाकार तथा मुख्य अभियुक्त रेवतराज पुरी गगन र उनकी पत्नी केशावती पुरी उपस्थित भएका थिए ।

विशेषका अनुसार गगन र केशावतीसँग एउटा मुद्दामा ६० हजार रुपैयाँ र अर्को मुद्दामा ३० हजार धरौटी माग्ने आदेश भएको छ । उनीहरुले रतुवा खोलाछेउको बिगहौँ जग्गा व्यक्तिका नाममा दर्ता गरेको भेटिएको थियो ।

अख्तियार दुरुपयोग अनुसन्धान आयोगले गत १३ फागुनमा उनीहरुसमेत यसमा संलग्न अन्य व्यक्ति र जग्गाधनीहरुलाई समेत प्रतिवादी बनाइ मुद्दा दायर गरेको छ । सरकारी जग्गा व्यक्तिका नाममा ल्याएको भन्दै यो मुद्दा दायर भएको हो ।

पुरीलाई विशेष अदालतले सम्पत्ति शुद्धिकरण मुद्दामा पनि दोषी ठहर गरिसकेको छ । उनी माओवादी निकट मानिन्छन् ।