घरबाटो सिफारिसका लागि १५ लाख घूस लिएका वडाध्यक्ष भ्रष्टाचारी ठहर, ३१ गते सजाय निर्धारण हुने

२७ असार, काठमाडौं

बनेपा नगरपालिकाका वडाध्यक्ष नृपेश बादेलाई विशेष अदालतले भ्रष्टाचारी ठहरग रेको छ । उनीमाथि ३१ गते सजाय निर्धारण हुने भएको हो ।

बिहीबार विशेष अदालतले उनलाई कसूरदार ठहर गर्दै सजाय निर्धारणका लागि पेसी तोकेको हो । यस मुद्दामा विशेषका अध्यक्ष टेकनारायण कुँवर तथा सदस्यहरु रामबहादुर थापा र रितेन्द्र थापाले यस्तो फैसला गरेका हुन् ।

काभ्रेपलाञ्चोकको बनेपाको वडा नंं ९ का अध्यक्ष बादेले सेवाग्राहीसँग घूस मागिरहेको भन्ने सूचना अख्तियार दुरुपयोग अनुसन्धान आयोगमा पुगेपछि अख्तियारको टोली खटिएको थियो । टोलीले बादेलाई १५ लाख घूस लिइसकेको अवस्थामा गत वर्ष ३ माघमा पक्राउ गरेको थियो भने २६ माघ ०८० मा मुद्दा दायर भएको थियो ।

यस मुद्दामा बादेलाई दुई वर्ष ६ महिनादेखि चार वर्षसम्म कैद हुनसक्ने भन्दै उनको सजाय निर्धारणको लागि पेस गर्ने आदेश भएको हो । दुवै पक्षको बहसपछि उनलाई कति सजाय गर्ने भन्ने तय हुनेछ ।