सुदूरपश्चिमका मुख्यमन्त्री सोडारीकी पत्नीलाई नक्कली प्रमाणपत्र मुद्दामा कैद सजाय

२७ असार, काठमाडौं

सुदूरपश्चिम प्रदेशका मुख्यमन्त्री दीर्घ सोडारीकी पत्नी नक्कली प्रमाणपत्र पेस गरी भ्रष्टाचार गरेको मुद्दामा दोषी ठहर भएकी छिन् । बिहीबार उनलाई विशेष अदालतले कैद तथा जरिवानाको सजाय तोकेको हो ।

गीता सोडारीले नक्कली प्रमाणपत्र पेस गरी भ्रष्टाचार गरेको मुद्दामा उनलाई ६ महिना कैद सजाय तोकिएको विशेष अदालतले जनाएको छ । साथै उनलाई १० हजार रुपैयाँ जरिवानासमेत हुने भएको छ ।

गीतामाथि ०७९ को ७ असोजमा अख्तियार दुरुपयोग अनुसन्धान आयोगले मुद्दा चलाएको थियो । यस मुद्दामा विशेषका अध्यक्ष टेकनारायण कुँवर तथा सदस्यहरु रामबहादुर थापा र रितेन्द्र थापा सम्मिलित इजलासबाट फैसला आएको हो ।

गीताले कैलालीको धनगढी उपमहानगरपालिका वडा नं. ९ स्थित श्री शिव माध्यमिक विद्यालयमा प्राथमिक तहमा पढाउँदै आएकी थिइन् । उनी त्यहाँ राहत शिक्षकका रुपमा कार्यरत थिइन् ।

उक्त पदका लागि उनले नक्कली प्रमाणपत्र पेस गरेको अख्तियारको अनुसन्धानले देखाएको थियो । उनले भारतबाट एउटै तहका दुई वटा माध्यमिक उत्तीर्ण सरहका (कक्षा १०) प्रमाणपत्र ल्याएकी थिइन् ।

अनुसन्धानका क्रममा ती दुवै प्रमाणपत्र नक्कली रहेको भेटिएपछि मुद्दा दायर भएकोमा ठहर हुने फैसला भएको हो । गीताले भ्रष्टाचार निवारण ऐन ०५९ को दफा १६(१) बमोजिम कसुर गरेको भन्दै इजलासले उनलाई सजाय सुनाएको हो ।