विपी राजमार्ग पुननिर्माणका लागि साढे ९ अर्बभन्दा बढी लाग्ने

२१ पुस, काठमाडौं।

बाढीपहिरोले क्षतिग्रस्त सिन्धुली बर्दिवास जोड्ने विपी राजमार्ग पुननिर्माणमा साढे ९ अर्ब रुपैयाँभन्दा बढी लाग्ने देखिएको छ । गत असोज दोस्रो साताको बाढीपहिराले उक्त राजमार्गको ठूलो भागमा क्षति पुर्याएकोथियो ।

डिभिजन सडक कार्यालय भक्तपुरले गरेको स्थलगत अध्ययनअनुसार ९ अर्ब ६६ करोड रुपैयाँ पुननिर्माणमा लाग्ने देखिएको छ । भकुण्डेबेँसीदेखि नेपालथोकसम्मको १२ किलोमिटर खण्डमा विभिन्न स्थानमा बगेका ८ किलोमिटर सडक पुननिर्माणका लागि उक्त रकम लाग्ने भएको हो । यद्यपि यसका लागि रकमको स्रोत सुनिश्चित भइसकेको छैन ।

उक्त सडकमा तीन किसिमका पर्खाल लगाउनुपर्ने अध्ययनबाट देखिएको छ । यद्यपि पुल बनाउने कि पर्खाल लगाउने निर्णय भएको छैन । फेरि पनि खोलाको ठूलो बाढी आउन सक्ने ठाउँमा आरसिसी वाल लगाउनुपर्ने देखिएको छ भने कतै प्लम वाल र कतै गेभियन वाल लगाउनुपर्ने देखिएको छ ।

सोहि सडकखण्डका विषयमा राजमार्ग निर्माण गरेको जापानी सरकारको सहयोग नियोग जाइकाले पनि अध्ययन गरिसकेको छ । कात्तिक दोस्रो साता गरिएको अध्ययनपछि नेपाल सरकारले अनुदानको लागि प्रस्ताव तयार गरिसकेको छ ।

त्यहाँबाट सकारात्मक जवाफ नआए एसियाली विकास बैंक र विश्व बैंकसँग ऋण लिइ पुननिर्माण अघि बढाउने तयारी सरकारको छ । मिलेसम्म ०८२ अघि नै ठेक्का प्रक्रिया सुरु गरिनेछ ।

हालसम्मको जनशक्ति र अध्ययनअनुसार सडक पुननिर्माणमा कम्तीमा पनि दुई वर्ष लाग्नेछ । बाढीपछि दुई सातामै अस्थायी रुपमा आंशिक एकतर्फी गरी उक्त राजमार्ग सञ्चालन भए पनि रातको समयमा भने सवारी साधन चलाउन रोक लगाइएको छ ।

विपी राजमार्गले राजधानीलाई मध्यपहाडी तथा पूर्वी नेपालसँग जोड्छ । जापान सरकारको अनुदान सहयोगमा आर्थिक वर्ष २०५३÷०५४ देखि १६० किलोमिटर यो राजमार्गको निर्माण सुरु गरिएको थियो भने ०७२ को असारमा सबै खण्डको निर्माण सम्पन्न भएको भनी नेपाल सरकारलाई हस्तान्तरण गरिएको थियो ।